...طول ما ندى قفانا للجاموسة عالترعة

قراءة سريعة للتطورات الأخيرة (ماشى؟ قراءة يعنى استنباط)

حيث أن الكرة البللورية التى تنبئ و تتوقع الأحداث مازالت تعطى تقديرات دقيقة الى حد كبير (أعتقد 90% معدل مش بطال أبدأ) يبقى خلونا نفكر مع بعض شوية.

يوم 10 فبراير دار حوار مهم بين بعض الأصدقاء بعد الخطاب الأخير للمخلوع و الذى قوبل بالنعال فى الميدان. النغمة و التوجه المعروض فى النقاش مستمر من نفس الأطراف حتى الآن مما يؤيد ان تناول الكثيرين منا للأحداث هو انفعالى عاتشفى و ليس عقلانى فى واقع الأمر.

ما علينا

المهم، أحد وجهات النظر كانت إن الموضوع كده وسع و مش نافع الاستمرار فى الضغط لأن الراجل مش ناوى يتّعتع و الجيش مش راضى يشيله يبقى لازم يبقى فيه مفاوضات و تنازلات متبادلة و الا البلد حتتحرق. وجهة النظر الأخرى كانت أنه قد سبق و حذرنا ان المظاهرات دى مش نافعة و العند ده مش معقول أبداً و كده خلاص الناس طالعة على القصر الجمهورى و البلد راحت فى الكازوزة و الحقونا بكباية ميه.

النظرة الثالثة (طبعاً عارفين مين!) ان وقت التراجع فات من زمان - من يوم الجمل و ليلتها - و الموضوع فعلاً حياة أو موت ، قاتل يا مقتول و خاصة بعد تصريحات عمر سليمان و تهديده المستتر (فى حديث مع قناة ABC على ماأتذكر) انه حيبعت "يتكلم" مع أهالى الشباب المعتصم و لما المذيعة قالت بس أهلهم هناك معاهم قال خلاص حنكلم جدودهم و جداتهم عشان يعقلوا الأولاد و الأحفاد !
بالإضافة لذلك كان الرأى ان الكلام فى الخطاب لم يكن مجرد عناد أو غشومية بل كان مقصوداً أن يكون متعجرفاً و متكبراً. و سبقه شحن شديد من تصرفات و تصريحات عمر سليمان (بعد أن فشل فى شق الصف بالمفاوضات و الاجتماعات مع أحزاب الضياع و عواجيز مكتب الإرشاد) بأن الشعب مش جاهز للديمقراطية و مكانة مبارك الأب و مش ممكن حتفضلوا قاعدين و الدولة قوية و صبرنا سينفذ... الخ.

شحن رهيب ثم تسريب أخبار أن المخلوع سيلقى خطاب و الروينى يبشر الناس فى التحرير انهم حيسمعوا أخبار كويسة و يأتى الخطاب المتعجرف الواطى ليشعل غضب الناس. الهدف؟ أن تتحول الاعتصامات و المظاهرات الى تكسير و حرق و فوضى و عنف و لا يكون أمام المجلس المحترم الا فرض الأحكام العرفية و التدخل الفورى بقوات الجيش لإنقاذ البلاد من الدمار. عندها لن يرفض قادة الوحدات الأوامر.

قوم ، نقبه جه على شونة و الناس لم تقتحم و لم تحرق و مسكت نفسها – الخطة البديلة تم دفعها فوراً : زجاجات المياه و العصير للجماهير أمام التليفزيون و القصر الجمهورى ثم الكلمة التاريخية لعمر سليمان و الراجل اللى وراه. و هييييييه مصريتنا حماها الله و الجيش والشعب ايد واحده.
الباقى كلنا عارفينه و عشناه مع بعتشينا. شوية عاشوا فى أحلام و أوهام "حسن الظن" و البعض الآخر – القلة – عمال يصوت و يشق هدومه و يدلق جرادل تلج على دماغ الباقيين يمكن يقوموا من النوم و يشوفوا البلوة اللى حطت على البلد و التفريغ و الاستنزاف الممنهج للثورةو للأسف ما حصلش نصيب. بالتدريج الموضوع كان عمال يوضح بدرجة تذهل ان فيه ناس كتير برضه مش شايفة.

ايه كل الكلام الملعبك ده؟ و ليه؟

لأن الموضوع بيتكرر تانى بنفس الطريقة ، ما هو أصله كتالوج متحضر و متذاكر بمساعدة أبالسة من الجيران و الحلفاء عبر البحار و المحيطات و متوزع على الحكام العرب كلهم. الحركة الواطية بتاعة ماسبيرو ، التليفزيون حاول يقوّم المسلمين عشان يدبحوا فى الأقباط و لما ما نجحتش اللعبة راحوا يجرجروا الشباب و يتهموها فيهم. و الناس تشيط أكتر. و يستمر الشحن، اللقاء الفاكس مع ابراهيم عيسى و منى الشاذلى و الاعلان بوقاحة انهم قاعدين لغاية 2013 و انتهى الأمر بالوثيقة العظيمة امبارح.

كلنا عارفين (حتى اللى عامل فيها عبيط برضه عارف) إن وراهم بلاوى و فلوس مسروقة و عمولات و عارفين انهم ممسوك عليهم كوارث من مخابرات الحبايب، و عارفين ان كل التربيطات مع الدقون اتعملت علشان يضمنوا ان البلد تفضل فى ايدهم و ما حدش يحاسبهم  بعد الانتخابات الهلس اللى جاية.

ساذج مين بقى اللى يعلن و يحاول يمرر الموضوع ده دلوقتى؟ و ليه؟ ده لسه محذرينكم أكتر من مرشح رئاسى انكم تطلعوا جدول تسليم السلطة بمواعيد واضحة بحد أقصى ابريل 2012، و يوم الجمعة قالوا حنعتصم لو ما اتلميتوش، يبقى النتيجة و الرد بالكلام ده؟ طبعاً الناس حتغضب و تطق من جنابها و الغضب مع الشحن يعمل ايه؟ تانى الأمل من عندهم فى انفجار و عنف و بهدلة يوم 18 علشان يلموا الدور و نخلص. و بكده نبقى خلصنا من مشكلة الخوان كمان لأنهم مش مضمونين بعد ما يقعدوا فى المجلس يقلوا عقلهم و يقلبوا عليهم. ما حصلش خير و بركة يبقى نطلعلهم وعد و لا اتنين من نوعية البيانات السابقة (ألا ضحيح هم بطلوهم ليه و وقفوا على رقم كام و لا يمكن عليهم فلوس ايجارالصفحة خلص و مش لاقيين ؟) و نبقى عرفنا حيحصل ايه لما الدستور المحترم يطلع بوكسته من مجلس الشعب (قصدى مجلس الطراطير).

على فكرة الاكتفاء بالقول بأنهم سذج و أغبياء ليس من الحكمة اطلاقاً: الساذج هو من يفترض السذاجة فى الخصم الخبيث الذى نجح فى استنزاف و تفريغ الثورة من الزخم و الطاقة و حوّل اللوم بل و الاتهام إلى من أشعلوشرارتها.  

طول ما حنا موكوسين و سايبن قفانا يخلل فى الترعة حيفضل مجلس البهارسيا فى جتتنا يرعى و يبرطع كمان.

لازم يغوروا. مش حينفع أى بديل تانى. و ييجى مجلس رئاسى يتفق الناس عليه مع بعض فى الميدان (أى ميدان انشالله يكون دوران  شبرا و لا مستشفى عين شمس) و الأسماء المحترمة تم ترشيحها فعلاً و صعب أصدق ان يبقى فيه اعتراض على توليفة من نوعية د. عبد المنعم أبو الفتوح و د. حازم أبو اسماعيل و د. محمد البرادعى و المستشار مكى و المستشار زكريا عبد العزيز و غيرهم.

الحكاية مش بالتعقيد ده بس لازم الناس تصمم و تثبت و تصبر. بالترتيب ده: تصميم على الهدف و ثبات على الموقف و صبر على المكاره.  مش معقول أبداً يبقوا الناس فى اليمن و سوريا أكثر شجاعة أو صبراً من المصريين. دى حتى تبقى جرسة و عيبة. و لا إيه؟     

حد تلااتة، حد تلااتة، هو بعد تلاتة ايه يافندي؟

حيث ان البعض تتعبه لغة إعمال العقل و المنطق و يؤرقه

 الحديث عن المبادئ التي لا تبرر المصالح المؤقتة و لا تؤيد موروثات التعصب، و يميل لتصديق كل و اي حاجة تقال و .يعطيها نفس وزن الدليل المرئي، خلونا بقي نتكلم بالأرقام شوية

حسب الدراسات العسكرية للحروب و الصراعات عبر التاريخ، لما جيشين يتقابلوا في ساحة القتال - بعيداً عن جرائم الحرب- نسبة القتلي الي الجرحي من الجنود تبلغ تقريباً قتيل واحد لكل ٣ جرحي. تاني، دول جيوش نازلين يقتلوا بعض مش يتخانقوا- طيارات و دبابات و مدفعية و بهدلة مش سنج و مطاوي و شوم و لا حتي مسدسات و كلاشنكوف. 

ماشي؟ طيب لو المعارك دي مش متماثلة ، "غير سيمترية" بلغة السفلة من الجيش الصهيوني و أعوانهم من الجيش الامريكي. يعني جيش نظامي ضد مقاومة شعبية و حرب شوارع، المدنيين أخبارهم إيه ؟ نسبة "الإصابات الغير مقصودة" هي ١٠ لواحد ، يعني ١٠ يتقتلوا لكل واحد مسلح او عسكري من المقاومة يقتلوه. خلاص؟ دي بس زيادة توضيح عشان فيه حد حيطلع يقول ما تشوفوا الدول اللي بتقول علي نفسها متحضرة بتعمل إيه. 

في الثورة البوليس المصري و حبايبه في خلال أقل من اسبوع قتل ألف و أصاب علي الاقل ٥٠٠٠، واحد لخمسة (مع إغفال الألف مفقود لو حطيتهم النسبة تبقي ١ الي ٢.٥ أسوأ من الحروب المباشرة؛ حضراتهم كانوا بيحاربوا بغل اكتر من اليهود في جنوب لبنان.

اما مئات الآلاف او الملايين من المتظاهرين اللي نزلوا، فدول قتلوا ٣٦ ضابط علي حسب تقرير وزارة الداخلية و الله اعلم ماتوا ازاي فعلاً (اللواء البطران مثلاً) و لا يوجد إحصاء أعلمه عن إصابات او وفيات الجنود. 

يوم السفارة جرح ١٠٤٩ و قتل تلاتة. الحقيقة البوليس كتر خيرهم، تطوروا جداً و بقوا تخصص عاهات أكتر من القتل في التعامل مع المظاهرات. 

ننقل بقي علي يوم ماسبيرو و نفتكر كده الأرقام المعلنة: اللي نزلوا آلاف ، كام مش معروف بس الأكيد انهم آلاف، و الأكيد كان فيهم ستات و أطفال (ايوه صح للتمويه واخد بالي). مات ٧ بالرصاص و ٢٠ باصابات مختلفة معظمها مرتبطة بدهس المدرعات (المسروقة، حاضر، مش دي القضية دلوقتي). و المصابين٣١١ حسبما اعلنت وزارة الصحة. يعني النسبة كام؟ حوال ١ الي ١٠. فاكر الارقام السابقة. العساكر المذعورة الغير مسلحة قتلوا واحد من كل عشرة اصابوهم. "بس دول قتلوهم القناصة و المدرعة المسروقة اللي كان فوقها عسكري متنكر" حاضر ماشي شغال.

طيب نيجي بقي لمجموعة الـ ٦٦. لو طبقنا نفس القاعدة و افترضنا ان اللي نزلوا كانوا مسلحين بمدافع أر بي جي و دبابات كمان يبقي المفروض نسبة القتلي للمصابين في صفوف الجيش تبقي كام ؟ ١ الي ٣. و عشان خاطر هم مش معاهم لا دبابات و لا مدافع خليها خمسة و عشان مش مدربين عسكرياً خليه سبعة مش حتي عشرة. يبقي المفروض فيه كام مصاب ؟ حوالي ٤٦٠ يعني اكتر من العدد الكلي للقوة اللي كانت موجودة عند التليفزيون حسب تصريح المجلس الموقر (٣٠٠). بس مش ده المهم.

٤٦٠ مصاب و ٦٦ قتيل من عساكر مدربين و لابسين خوذ و دروع و معاهم سلاح (فشنك حفوتها دي بس فيه سنكي و اللي قدامهم ما يعرفش انه فشنك) وراكبين عربيات مدرعة. في حين ان اللي عددهم اكبر و محشورين في بعض و ماشيين علي رجليهم و محتاسين بالعيال و الستات و إخفاء السلاح الختشير اللي معاهم و بيخبوا البلطجية "المندسين" وسطهم و القناصة اللي مستهدفينهم مات منهم ٢٧ و أصيب ٣٠٠.

حتقول دول القناصة اللي موتوا العساكر. يعني مش الأقباط بقي؟ احترنا معاكم و الله. و كام قناص دول اللي بيصطادوا عساكر الجيش زي العصافير كده؟ و ليه ما قتلوش نفس العدد او حتي ربعه من الأقباط و باقي المتظاهرين عشان يولعوها أكتر؟ و لا ما عرفوش يفرقوا؟ عشان الدنيا كانت ضلمة؟ و لا نسيوا المنظار بتاع البندقية؟ 

بالذمة اللي يصدق الكلام ده مش المفروض يصدق بقي ان الداخلية مافيهاش قناصة و ان كل اللي مات في الثورة بلطجية ماتوا قدام الأقسام و ان فعلاً المدرعات بتتسرق من وحدات الجيش و ان المخلوع كان لا ينتوي و لم يصدر اي امر باي حاجة و كان في الحمام اصلاً وقت الثورة ما قامت؟ 

شهداء ٢٥ يناير... ماتوا في احداث يناير 

الحمد لله كان زمانهم دلوقتي ماتو من الحسرة و القرف.

هو مش الأخ مؤمن برضه و لا... و العياذ بالله؟

رغم ان الاستشهاد بالأحاديث الشريفة و آيات الذكر الحكيم صارت مؤخراً مطية البر و الفاجر كما يقولون إلا أن الموضوع هنا يستحق التذكرة فإن كانت في محلها فمن فضل الله و إن كانت غير ذلك فمن نفسي و اسأل الله العفو.

بسم الله ، و الحمدلله و كفي و الصلاة علي عباده الذين اصطفي:

روي عن النبي صلى الله عليه وسلم: أنه قام لجنازة يهودي فقيل له: إنه يهودي فقال صلى الله عليه وسلم: "أليست نفس

وفد نصاري نجران عندما جاؤوا لمقابلة النبي في المدينة استضافهم في المسجد (المسجد النبوي) و أقاموا صلواتهم فيه (في المسجد النبوى )و. 

و بعد يوم أحد ، و قد رأي اصحابه و عمه سيد الشهداء و أسد الله قد مثل بهم فرفع يديه داعياً فقال الصحابة سيدعوا عليهم فقال :" اللهم اهدِ قومي فإنهم لا يعلمون"

و في سورة الكهف: "فلعلك باخع (مهلك) نفسك علي آثارهم إن لم يؤمنوا بهذا الحديث أسفاً" (٦) أي انه حزين عليهم ويتحسر علي عدم إيمانهم بدعوته و اجهد نفسه و حملها فوق ما يلزم مبلغ الرسالة (. من الشعراوي)

لاحظ ان الحديث الأول عن اليهود الذين لم يكتفوا بتكذيبه و محاولة تفريق المسلمين بل و تآمر أغلبهم لقتله في المدينة و كان رأس المنافقين منهم. 

أما الثاني و الآية من سورة الكهف فهي عن الكفار (كفار بجد و حق و حقيق، واخدلي بالك؟) و منهم من ضربه و خنقه و القي امعاء الناقة عليه و هو ساجد و سبه و حاول قتله. 

يه بقي لازمة الكلام ده؟ 

 لازمته إن الأيام دي أيام فتنة - بمعني امتحان مش بالمعني بتاع فتنة طائفية- ينقي فيها الذهب من الشوائب عندما يدخل نارها. و كل منا يجد نفسه امام مواقف لا يتوقعها من الأقارب و الأصدقاء ومن تعرف عليهم في الفضاء الافتراضي بسبب الثورة. كل منا خسر بعض من كان يحسبهم علي خير في تفكيرهم و اكتسب آخرين ما كان ليعرفهم من قبل. 

هو ايه اللخبطة دي؟ 

صبرك عليا بس...

الأزمة الاخيرة بعد موقعة ماسبيرو (ما تقلقش مش حتكلم عن مين اللي بدأ و مين اللي سرق المدرعة أو أكل الجبنة) كشفت كمّ مهول من الصديد في نفوس البعض، مسيحيين (او نصاري عشان اللي بيحب يسميهم كده) او مسلمين. و حيث أني مسلم و الحمد لله و انه كما يقول أصحابنا "إحنا هنا الأغلبية " يبقي الاولي بكلامي المسلمين و الأقربون اولي بالمعروف.

ما كنت أتصور أن أسمع "احنا و هم" تتكرر بهذه الطريقة، خاصةً عندما يأتي بعدها "أصلنا سكتنالهم زيادة فهم بقي ساؤو فيها" ناهيك عن مؤامرات لتقسيم البلد و أطفال المسيحيين الذين يربيهم القساوسة علي اننا محتلين و هم اصحاب الارض و لذلك دمنا حلال و ماسورة مجاري انفتحت من كل جهة عن الأنجاس الذين يجب ان نطهر الارض منهم و يا اما يقعدوا بأدبهم يا إما يأخذوا بالمركوب.

خلونا نتكلم بصراحة شوية ما دام بعضنا مصمم يتجاهل حق الدم و الادب الفطري في احترام مشاعر اهالي من قتلوا و يرفض الانتظار حتي تهدأ القلوب المكلومة قبل ان يتحفنا بنظريات المؤامرة و أصل مشكلة الأقباط و عقيدتهم و مساهمة ذلك في المجزرة الاخيرة. 

بص لنفسك في المراية كده و افتكر كام مرة سمعت حد من العائلة او حضرتك شخصياً بيقول: اربعة ريشة ، عضمة زرقا، صليبيين ، وشوشهم صفرا، اصلهم ما عندهمش أخلاق ، بناتهم مش محترمين، ازاي الجزمة ده يصاحب واحدة مسلمة، و الزملاء اللي في طب في الجامعة يا تري عارف الأقسام اللي لا تسمح بتعيين المسيحيين او نجاحهم في الدكتوراة؟ سمعت مرة حد من اساتذتك الكبار زي ما حصل مع الفقير بيقول علي واحد من زمايلك المتفوقين "قولوا للواد ده ما يكتبش القسم في الاستمارة ..... عشان مش حناخده" ؟

كام مرة سألت اللي قدامك "اسم حضرتك ايه؟ أشرف ايه ؟ حمدي ايه ؟ جميل ايه؟ طب ما تيجي تصلي الـ .... هو المغرب ادن؟" او "ما تقوم بقي تتوضي عشان ننزل نصلي " و تفضل وراه لغاية ما يزهق من اللي خلفوك و يقولك يا عمي مسلم يا عم او يبص لك بأسي و يقولك "معلش احنا بنصلي في مواعيد تانية." 

هل حاسبت نفسك مرة و سألت ان كان تصرفك و كلامك (في النقطة دي بالتحديد) يتفق مع الشرع او السنة او الفطرة او حتي الشعارات الجوفاء اللي بنقولها عن الأخوة في البلد و الدين لله و الوطن للجميع؟ هل فكرت لو النبي صلوات ربي و سلامه عليه كان قاعد جنبك حيبقي راضي و سعيد بكلامك ده؟ 

هو ده اللي اتكشف مؤخراً. اتعرينا من كل ورق التوت. لا أتكلم عن شيوخ الفتة الذين نعلم ممن يأخذون تعليماتهم و لا عن أدعياء العلم و التدين و لا بعض قاطني بلاد البترول فهؤلاء كلامهم هو هو و ان كان ما حدث فرصة ذهبية لينبحوا في الخرابة الجديدة التي هيأ لهم خيالهم السقيم انها جنة، لا اطلاقاً، انا أتكلم عن من هم مثلك و مثلِك (بلاش خليهم مثلي انا) و مثل "الناس العادية" و "المعتدلين" و اصحاب "التوسط". اتكلم عن موروث التعصب و القبلية الذي لا يفرق بين الظاهر و الباطن ، ما لله و ما للناس و ينسي ان الخواتيم غير معلومة و ان من تحكم عليه الان انه خارج رحمة الله قد تجده في جنة رضوان و تجد نفسك (بعد الشر يا سيدي خليها نفسي انا) و العياذ بالله في سجين. 

قبل ان تنقب بشغف عن آخر فيديو ظهر لمتطرفين من أي ديانة يسبون ديانة الآخر ، هل فكرت إن كان لهذا علاقة بما في نفسك ؟ هل يحل شيئاً او يقرب من الحقيقة فيما حدث ؟ هل فكرت ماذا يعني هذا لمن شاهدوا أبناءهم و أحباءهم مهشمي الرؤوس و مقطعي الأطراف موضوعين علي الثلج في المشرحة لان الثلاجات امتلأت ؟ بلاش هل أضاف هذا شيئاً او قلل من فجيعة الأهالي في قتلاهم من الجنود ؟ بل ماذا تظن ان يفعل اخ او اب لجندي قيل له ان المسيحيين قتلوا ابنك (ان صح الادعاء) و بعدها اسمعته هذه الدرر، ماذا سيفعل بجاره المسيحي؟ ماذا استفدت انت عندما طعنت في نوايا الناس و انطلقت تحلل في اصول كرههم للمسلمين و سفهت من أهمية هدم و حرق اماكن عبادتهم مرات و مرات بدون حتي فتح باب تحقيق جاد او هزلي؟ 

المسلم يا اخوانا يجوز له أن يتزوج من مسيحية او حتي يهودية، بالذمة أم عيالك حتروح البيت و تضحك في وشها (مش حأقولك حاجة تانية) و في سرك تقول "انتي أصلك عضمة زرقا و حتروحي جهنم حتف؟"

بلاش ، خللي اللي في نفسك في نفسك، ما هو مش حاقول كل ده و ادخل في نيتك كمان ، بس مافيش اي نظر ؟ الرحمة و العدل و الكياسة و حسن الفطن؟ سمعت عن فقه الأولويات ؟ لو بيتك مهرجل و مبهدل و مليان زبالة، تنظفه الاول و لا تفتحه عالبحري عشان اللي ما يشتري يتفرج و يتفقع كمان؟

"يأيها الذين آمنوا كونوا قوامين لله شهدآء بالقسط ولا يجرمنكم شنئان قوم على ألا تعدلوا اعدلوا هو أقرب للتقوى واتقوا الله إن الله خبير بما تعملون" 

(المائدة: 8)

بالله عليك هل هي صدفة انه (يرجح) أن آخر آية أنزلت من القرآن هي الآية 281 من سورة البقرة: "'و اتقوا يوماً ترجعون فيه الا الله ثم توفي كل نفس ما كسبت و هم لا يظلمون"

ربنا يهدينا جميعاً.

سبحانك اللهم و بحمدك أشهد أن لا اله إلا أنت، أستغفرك و أتوب إليك.

و آدى التمويل اللى فلقتونا بيه

  طلب احد الزملاء من حوالى 3 اسابيع ان نبحث عن قصة التمويل المقدم من هيئة المساعدات الخارجية الأمريكي (USAID) الى المنظمات الأهلية و الحقوقية بعد ما استعرت المناقشات و الجدل على صفحات الجرائد و البرامج الحوارية التليفزيونية تابعاً اتهامات اللواء الروينى لمجموعة 6 ابريل و زيارة اللواء العصار الأخيرة الى واشنطن.

·         فبحثنا و هذا ما وجدناه و معه بعض التوضيحات مع تجنب تقديم تحليل أو تعليق بقدر الامكان إلا للتوضيح.

1-      هيئة المساعدات الخارجية الأمريكية ناشطة منذ سنوات طويلة بعد فى دول كثيرة  و منها مصر بالطبع و قامت بتمويل مشروعات و أنشطة عديدة معظمها مع الوزارات و الهيئات الحكومية تتعلق بترميم الآثار و نزح المياه الجوفية من مناطق القاهرة القديمة حول المساجد العتيقة و المشروعات الثقافية و التتعليمية و المجارى و النقل و تكنولوجيا المعلومات (لاحظ مثلاً أن علامتهم على غرفة التشغيل فى سنترال مصر الجديدة فى جسر السويس) و حتى توريد القمح الأمريكى.

2-      الهيئة حكومية و تتبع الرئيس مباشرةً  - بمعنى أن مديرها يرشحه رئيس الجمهورية ثم يقوم الكونجرس باستجوابه و التصويات على تعيينه (يعنى هو بدرجة وزير مثله مثل كلينتون مثلاً).

3-      تأسست عام 1961 فى إدارة الرئيس كينيدى كتابع لمشروع مارشال الشهير لتعمير أوروبا بعد الحرب.

4-      أحد قطاعات الهيئة هى قطاع تنمية الحكم الديمقراطى (The Office of Democracy and Governance ODG) و يعنى بمساعدة الشعوب على تنمية الحكم الديمقراطى ، المحليات حقوق الانسان ، حماية البيئة ، تنقية مياه الشرب الخ (الوثيقة التنفيذية موجودة على http://www.usaid.gov/our_work/democracy_and_governance/publications/pdfs/DG_UserGuide_November10.pdf) 

5-      ظهرت الأزمة الأخيرة بعد إتهام المجلس العسكرى و الحكومة المصرية للهيئة بتمويل جمعيات و هيئات حقوقية مصرية تعمل بأجندات ضد مصر "من ورا ظهر الحكومة". و تم ربط حجم المشكلة باستقالة المدير المحلى للهيئة بمصر (جيم بيفر) فجأة بعد فترة قصيرة من بدء عمله.

·         بعد كده بحثنا عن تاريخ  مكتب  ODG و نشاطه فى مصر حتى الفترة الحالية فى ملفاتها الرسمية و فى الصحف المحترمة و هذا ملخص لما وجدناه:  

1-      حجم المساعدات الغير عسكرية المخصصة لمصر من الهيئة حوالى 415 مليون دولار سنوياً (المساعدات العسكرية غير المشروطة تبلغ 1.5 مليار دولار سنوياً)

2-      من ال 415 مليون كان متوسط المخصص للديمقراطية و حقوق الانسان 24 مليون دولار سنوياً بين سنة 1999-2009. هذا هو المتوسط و لكن الرقم الفعلى زاد بنسبة 97% فى سنة 2004 ليصل الى 51 مليون سنوياً و استمر ها حتى سنة 2008 و بلغ المبلغ الكلى الذى تم انفاقه فى الأربع سنوات  181 مليون دولار.

3-      هذا المبلغ مقسم كالتالى (مفاجأة رقم واحد):

a.       122 مليون دولار للحكومة المصرية فى اتفاقيات ثنائية لدعم التحول الديمقراطى و حقوق الإنسان

b.      59 مليون دولار فى 80 منحة مباشرة للمنظمات غير الحكومية لمشروعات المجتمع المدنى و التوعية و حقوق الانسان و الديمقراطية

4-      تقرير المراقب العام عن تأثير هذه البرامج يقول أنه "محدود جداً" بسبب عدم دعم الحكومة المصرية و الجدية فى التنفيذ للبرامج الحكومية (معظمها لم يحقق شئ) و على الجانب الآخر فإن كثير من المنح المخصصة للمنظمات غير الحكومية أوقفت لأن الحكومة أغلقتها لأنها رأتها نشطة بشدة زائدة Too aggressive و ضد مصلحة البلد (و تكرر نفس الكلام مباشرة من مبارك فى ويكيليكس)

5-       الجداول التالية توضح البرامج الحكومية و الهيئات المدنية التى تلقت التمويل حتى سنة  2009  (لاحظوا الأرقام و هي فين كفاية و 6 ابريل؟):

أتفاقيات حكومية ثنائية مع الحكومة المصرية

Project	Contractor	Contract No.	Start Date	End Date	Cost
Rule of Law and Human Rights Family Justice Project	Management Sciences for Development, Inc.	PFD-I-00-04-00175-00	Nov 05	Jul 10	$17,452,598
Good Governance Egyptian Decentralization Initiative	AECOM International Development	263-I-00-06-00015-00	Apr 06	Apr 11	$21,973,546
Civil Society Media Development Program	Management Systems International, Inc.	263-I-00-06-00008-00	Apr 06	Apr 11	$15,536,071
TOTAL			$54,962,215

منح لمنظمات المجتمع المدنى

Direct Grants Recipient	Registration	Agreement No.	Start Date	End Date	Total Obligations*
International Center for Journalists	No agreement with Ministry of Foreign Affairs	263-G-00-06-00071-00	Aug 07	Jan 09	$1,350,061
Internews Network	Agreement with Ministry of Foreign Affairs	263-G-00-06-00030-00	May 06	Apr 08	$1,200,000
Environmental Quality International	Civil company	263-A-00-07-00011-00	Feb 07	Aug 08	$588,650
Arab Penal Reform Organization	Civil company	263-G-00-07-00079-00	Aug 07	Aug 09	$957,588
The United Group	Civil company	263-G-00-06-00047-00	Jul 06	Jul 08	$271,320
The Coptic Evangelical Organization for Social Services	Nongovernmental organization	263-G-00-05-00060	Oct 05	Dec 08	$1,003,940
Al-Nakib Center for Training and Democracy	Nongovernmental organization	263-G-00-07-00020-00	Feb 07	Dec 07	$618,145
New Horizon Association for Social Development	Nongovernmental organization	263-G-00-05-00061-00	Oct 05	Sep 08	$839,185
The Arab Office for Law	Civil company	263-G-00-06-00093-00	Sep 06	Sep 08	$350,912
Egyptian Association for Human and Environmental Development	Nongovernmental organization	263-G-00-06-00095-00	Sep 06	Sep 08	$192,171
TOTAL			$7,371,972

6-      بسبب الفشل فى تنفيذ البرامج الحكومية و اصرار الحكومة المصرية على قصر التمويل للمنظمات المسجلة فى وزارة الشؤون الاجتماعية (بعد ما ألغت تسجيل المنظمات الغير مرغوب فيها) و الشكوى المتكررة من منظمات المجتمع المدنى بشكل عام (قال اللواء حسن عبد الرحمن لممثلى الحكومة الأمريكية – معروف من هو  طبعاً – فى وثائق ويكيليكس بعد أن أنكر حدوث أى تعذيب أو سوء معاملة فى السجون و أمن الدولة، أن الشيوعيون و المتطرفون يشكلون أغلبية من يعملون فى هذه المنظمات) فتم انقاص التمويل السنوى للنصف: حوالى 25 مليون.

7-      بعد ثورة 25 يناير تفائل المكتب بالجو الجديد فأعلن زيادة التمويل مرة أخرى الى ما يقرب من 62 مليون دولار (35 مليون منهم مخصصين من الأول لمنظمات أمريكية مدنية و للحكومة المصرية للمساعدة فى الانتخابات و "تدريب السياسيين" ؟ و الباقى مفتوح للمنظمات المدنية و بدأ البعض فى تقديم طلبات التمويل.

a.       مفاجأة رقم أثنين: مقال مطول فى الواشنطون بوست عن مجموعة قدمت على أحد المنح لعمل أفلام فيديو للتوعية. البهوات من شباب الحزب الوطنى و مساهمتهم العظيمة فى الثورة انهم لقوا فرصة بيزنس هايلة بقوا بيطبعوا تى شيرتات عليها شعارات الثورة و يبيعوها و لما سمعوا عن فتح باب التمويل تانى قدموا مشروعهم فى السفارة و اتوافق عليه و المبلغ ؟ 400 ألف دولار!

 http://www.washingtonpost.com/world/national-security/in-egypt-us-government-seeks-a-few-good-democrats/2011/06/28/gIQAlAFaKI_story_1.html

b.      يا فرحة ما تمت! “المش" مفاجأة رقم 3 : نفس كلام مبارك سنة 2008 تكرر تانى من المجلس و الحكومة: المنظمات دى مشبوهة و عندها اجندات أجنبية و ده تدخل خارجى فى شؤون مصر و عندنا معلومات بس هم غير مسجلين بوزارة التأمينات الاجتماعية و ما نعرفش عنهم حاجة و لازم نحقق. ....

c.       تم تعليق البرامج كلها! و االرجل استقال و مشى  

·         الحاجة الوحيدة الباقية هى تقديم طلب حصرى لكل المشروعات الممولة من المكتب خلال الخمس سنوات الماضية بناءً على قانون حرية المعلومات Freedom of information act)) و فعلاً أرسلته و فى انتظار الرد. ده بس عشان المتشككين ان فيه حاجات مستخبية و عشان نعرف بقى مين فى الحكومة اللى أكل الجبنة....

خلاص العرض خلص و مافيش تتر و لا إعلانات..

·         طيب طالما الحكومة و المجلس فاتحين صدرهم بالإتهامات ممكن بقى اللى يقرا يسأل نفسه و يسألهم بعض الأسئلة ؟

1-      الفلوس اللى أخدتها الحكومة و ما زالت بتاخدها لدعم أو هدم الديمقراطية و حقوق الانسان و الحيوان – راحت فين؟

2-      منظمات ايه اللى مش عارفينها و مش عارفين فلوسها؟ دا حتى التأشيرات لدخول أمريكا لا تمنح الا بعد الرد من أمن الدولة (الكلام ده من وزارة الخارجية فى أمريكا) و وقت انهيار الشرطة و تعليق شغل أمن الدولة السفارة وقفت كل التأشيرات لو حد فاكر. التعاون بين المخابرات و أمن الدولة و السفارة الأمريكية على أعلى مستوى و مستمر 24 ساعة فى اليوم.

3-      تمويل أمن الدولة جاىّ منين بالظبط ؟ فيه ضباط كتير سافروا ياخدوا تدريب فى أمريكا كذا سنة – منين ؟

4-      لو حد أخد باله فى الفيديوهات بتاعة اقتحام أمن الدولة فى مدينة نصر، فيه لقطة كانت الحيطة مخرومة و صوروا جواها عازل من الالياف الزجاجية. يعنى ببساطة الشركة اللى بنت المبنى ده شركة أمريكية لأنهم بيستعملوا ألواح جبس و يحطوا عازل بينهم من الفيبرجلاس. ده برضه معناه ان مصدر التمويل منأمريكا لأن القانون بتاعهم إنك تستخدم منتجات و شركات أمريكية بالمساعدات اللى بيدوها. ايه بقى البند ده بالضبط فى الميزانية ؟ و أنهو شركة اللى بنت زنازين تحت الأرض دى؟

بص بقى منك له: لو قريت و مش عارف ترد ياريت بقى تنقطنا بسكاتك لو سمحت عشان ورانا حاجات أهم بكتير من البحث عن الأشباح و الأوهام و الإشاعات بتاعة الروينى أفندى اللى بيكدب علناً و يعترف و يتساب مكانه.