بصوا بقى يا معلمين هلا هلا عاالجد و الجد إيه؟
هذوها الكلام المزكور أدناه متكلف جامد و خد بعص و تفعيص كتير فطأطأوا معايا كويس منك له...
لو سيادتك مستوسق و عارف و متأكد أن أكبر غلط فى تاريخ المحروسة انك تنزل يوم الجمعة يبقى عارف تعمل ايه؟
لزماً و لابد و حتماً انك تنزل!
"نعم يا خويا"
- صبرك بس – انت موش عاوز تنزل ليه؟
"دول حبة عيال مش فاهمين حاجة و عجبتهم لعبة المظاهرات"
- ماشى – 6 ابريل و المحامين و الائتلاف و النشطا كلهم حبة عيال و انت مخك كبير.. تمام؟ انزل يا سيدى اتأكد بنفسك انت عمرك قابلت الناس دى قبل كده ؟ روح و شوف إن كانوا عيال و فهمهم غلطهم ، و لو طلعوا ألالات الأدب اسكعهم قلمين و سلمهم للشرطة العسكرية تنفخهم
"المظاهرات و المليونيات دى بتخرب الاقتصاد و تعطل البلد"
- وهو مال المظاهرات بالانتاج و الاقتصاد أصلاً هو الاقتصاد كان مزقزق و الثورة قضت عليه و لا من الحرامية اللى سرقوا البلد واصحاب الأشغال اللى قفلوها و مشوا العمالو نايمين عالفلوس ؟ و لا الوزارة اللى مش عاوزة تضبط حدود الأجور و تتفاوض مع العمال (بس راضية تسايس فى البوليس و تزود مرتباتهم و هم برضه قاعدين عالقهاوى)؟ السياحة باظت بسبب المليونيات اللى العالم كله اتكلم عنها بانفهاش و لا البلطجية اللى جريوا وراهم فى الشارع و البوليس اللى عامل فيها السفيرة عزيزة؟
- و بعدين ماشى يا عم شوية عيال سيس مدلعين جهلة مش فاهمين ان اللى بيعملوه حيفلس البلد – تسيبهم كده و لا تروح تتناقش معاهم و تعرفهم غلطهم – مش ده واجب النصيحة لأخوك برضك يا أخى المؤمن و يا أختى المؤمنة؟ روح يا عم كلمهم و يا تكنعهم يا يكنعوك!
"الضغط الزيادة حيربك المجلس و يمكن يتهور و يقلب علينا و تبقى حرب أهلية"
- هوا المجلس ده حضانة أطفال لو زنقتهم فى الأودة يعملوا على روحهم؟ الناس دى متدربة تفعد على الجبهة فى الحرب بالأيام من غير أكل و لا شرب و تعيش فى مخابئ تحت الأرض ينضرب عليها قنابل و صواريخ و تاخد قرارات حياة أو موت فى ثوانى فى عز المعركة و البهدلة – لو حبة مظاهرات و مطالبات حتلخبطهم و تربكهم و تخليهم يقلبوا و يضربونا بالنار تبقى مشكلة كبيرة جداً و انت كده بتتهم الجيش إنه ممكن ينفذ أوامر ضرب المدنيين و دى خيانة رهيبة – يفرق ايه بقى ساعتها عن مرتزقة القذافى و لا خونة الأسد من العلويين؟ و لو فرضنا جدلاً ان دا ممكن يحصل فعلاً – مكانك يبقى مع المتفرجين على المسخرة دى و لا تقف مع الشعب قدام الخونة؟ (اللى أنا متأكد على فكرة انه مستحييييل الضباط و العساكر يعملوا كده حتى لو هددوهم بالاعدام)
"الناس دى مأجورة و عاوزة توقع بين االجيش و الشعب"
- هم أصلاً اعترضوا او انتقدوا الجيش؟ الكلام عن قرارات المجلس مش حتى عن أشخاصهم و المطالب مش مختلفة عن المطالب من أول الثورة و إن كانت واضحة أكتر و بعدين لو كان فيه ناس "مندسة" حتنزل تحاول تقومهم على الجيش و تخرب فى المظاهرة – مش واجبكم برضه تقفش الناس دى و تكشفهم و تصادر الأُبَيِّج اللى معاهم و تحمى البلد من شرهم و تنبه السذج العبط اللى نازلين بسلامة نية لخطورة الموكف فى هذوها المرحلة الدكيكة؟
"أنا مش فاضى – الأمور مأشفرة و الواحد طالع دين أمه"
- كان الله فى العون يا باشا – عدى بس و انت مروح كده و دردش مع الناس دى – اعرفهم و اعرف بيتكلموا فى ايه و ايه دين أم الموضوع بالظبط – بدل قعدة القهوة خد معاهم فنجال شاى و حجرينفى نص ساعة و لا حاجة و يمكن تطلع بعلبة كنتاكى.. لو كلامهم حلو اديك وقفت معاهم و أخدت ثواب لو وحش تف فى وشهم و روح و أديك طلعت قرفك فى حد..
"دول من ال22% و عاوزين يقلبوا الاستفتاء و يجيبوا مجلس رئاسى"
- فى منهم قال فعلاً عاوزين مجلس رئاسى – بس المطالب كلها دلوقتى مافيهاش مجلس و لا حتى رئاسى – و بعدين انت كنت عديتهم على صوابعك وعرفت انهم كلهم قالو لا فى الاستفتا – انزل و عد بنفسك و قولنا الاحصائية إيه...
"دول ليبراليين و علمانيين كفرة و عاوزين يشيلوا اإلاسلاميين"
- بص بقى لو انت فعلاً مقتنع بكده يبقى مش عاوز أشوف وش اللى جابوك هنا تانى و تقعد فى البيت مع أبو أنس الهى تولعوا فى بعض انتم الاتنين
لو خايف على البلد بجد و مقتنع ان النزول حيضرها
الناس دى نازلة نازلة – انزل و روح كلمهم و افهم و فهمهم غلطهم
